Siopau lleol yn cydweithio i ddarparu gwasanaeth siopa ar-lein
(www.poptotheshops.net)

Mae tref Caldicot, yng Ngwent wedi sefydlu 'rhith stryd fawr' lle gaiff y siopwr ymweld â phob un o'r siopau lleol drwy wefan arbennig. Y syniad ydi cynorthwyo busnesau lleol i gystadlu yn erbyn grym hollbresennol y cwmnïau archfarchnad mawrion. Mi fyddai syniad tebyg yn gweithio yn Eryri ac fe allasai fod yn arbennig o ddefnyddiol yng nghyswllt llety hunanarlwyol. Mi fuasai'n bosib gyrru manylion y nwyddau, y bwydydd a'r gwasanaethau sydd ar gael gyda nodyn cadarnhau'r ymweliad neu arhosiad, ac yna mi fuasai'r ymwelwyr yn gallu rhoi archeb i'r cyflenwr fyddai'n dod â fo i'r llety erbyn dechrau'r ymweliad.

Dechrau eich cynllun ailgylchu eich hun

Mewn rhannau o ogledd-orllewin Lloegr mae perchnogion gwestai, bwytai a busnesau eraill sy'n rhan o'r diwydiant arlwyo a lletygarwch, wedi dod at ei gilydd i ddechrau cynlluniau ailgylchu. Mae'r hyn maen nhw'n ei wneud yn amrywio o gyfrannu at gost sefydlu banc poteli, i drefnu arbedion grwp gyda chontractwr gwastraff masnachol. Mae modd felly arbed costau a hefyd, drwy gydweithio â phobl eraill, i lunio cytundeb gydag arbenigwr ailgylchu gwastraff - gan y byddwch gyda'ch gilydd yn cynhyrchu digon o wastraff i gael eich talu amdano.